質詢講國家語言，即時通譯來省時間！
台灣同國外議會即時通譯現況
9月27，陳柏惟立委頭一擺利用口譯服務在立法院裡肚用Tâi-gí（台灣台語）質詢，引起當多人討論。立法院這年9月27開始提供即時翻譯服務，委員一片講，通譯人員一片兩下半翻做華語，別儕戴耳機就做得聽著通譯个即時華語翻譯。單淨看質詢影片，國防部長請厥次長逐句翻譯，恁樣做毋係正式个即時通譯。用正式个即時通譯，會省質詢時間，溝通正係好，故所用即時通譯是講个人、聽个人、國家語言三贏个法度。
議會即時翻譯在台灣，毋係頭一擺。在2019年5月，苗栗縣議會就開始提供Toiˇ-vanˇ-fa（台灣話、台灣客話）翻華語个口譯服務。該時，Tâi-gí（台灣台語）族群kah Tayal（泰雅族）个議員，都利用耳機聽口譯，就聽有識Toiˇ-vanˇ-fa質詢麼个。在這隻報導个影片¹做得看著，議員講Toiˇ-vanˇ-fa該時，有口譯員坐在佢後背，兩下半翻做華語分別儕聽。時間差無3秒，故所毋會耽著議事。
頭擺在議會講國家語言還有一隻例：2020年，兩位立委Sra Kacaw（鄭天財）委員摎Sufin‧Siluko（廖國棟）委員在國會用Pangcah（阿美族語）質詢。甚至摎政府官員講，毋使再用華語講一擺；議事紀錄組會負責分族語記錄好勢，乜會翻做華語分民眾看有識。事情過後有文字翻譯，做得看著立法院愛行向語言平等个目標。
瑞士个國民院（National Council；兩隻國會議院之一），議事規則肚項，就針對語言个使用規定有幾隻做法：
- 辯論个內容愛即時翻譯做德語、法語、意大利語3隻官方語言（Official languages）；假使有人申請，乜會特別提供羅曼什語（Romansh） 个翻譯。
- 主席个重要發言摎命令有國會提供口譯人員隨時翻譯。
- 法律會同時用3隻官方語言公告。
- 別種文件至少用德語、法語2隻語言寫。
瑞士係多語言族群个國家，佢兜个政策自然會考慮著無共樣个族群；在台灣，立法院設通譯个意義，毋單淨分無共樣个語言互相理解，更加重要个係𠊎兜摎「逐語言在公共領域个使用權」拿轉來。意傳站在語言科技團隊个立場，支持大家用國家語言參與政治，乜肯定立法院提供人手摎設備，分全部个委員、官員正做得自由使用國家語言。
¹ 影片0:50~1:08有即時口譯員在翻譯个情形。
參考資料
- 「全國第一！苗栗縣議會客語同步口譯」，蘋果新聞網，2019年05月28日
- 「國會語言多元化 明年增族語口譯人員」，原住民族新聞台，2020年12月25日
- “The Swiss Parliament as a Polylingual Forum”, Philippe Schwab, 2014
- “The art of interpreting in Switzerland’s polyglot parliament”, Swissinfo.ch, September 26, 2019
